ისტორიები
  სოფო ბედიას ქმარი - ცოლს. არავინ იცის პირველმა რომელმა ჟურნალისტმა გამოიყენა ამგვარი წოდება სოფო ბედიას ქმრის მიმართ, თუმცა ფაქტია, ასეთი ორიგინალური ტიტული საკმაოდ დასამახსოვრებელი და გამორჩეულია.      „ხარისხის არხის“ ორი გამოჩენილი წამყვანი, რომელთა სახელებიც ჩვენთვის უცნობია ერთმანეთს დააზღვევდნენ, რადგანაც ვერცერთი ჩვენგანი ვერ წარმოიდგენს მათ ცალ-ცალკე. ისინი, ისეთივე განუყრელები არიან როგორც ბონი და კლაიდი, დონ კიხოტი და სანჩო პანსა ან Wall-e და ევა.   საქართველოს საფეხბურთო ნაკრები, რაგბის ეროვნულ ნაკრებს დააზღვევდა. ყველასათვის ცნობილია, რომ ჩვენი საფეხბურთო ნაკრები არც თუ სახარბიელო მატჩებს ატარებს წლების განმავლობაში, თუმცა მას შემდეგ, რაც რაგბის ნაკრებმა წარმატებებს მიაღწია, სპორტის ქომაგების ყურადღება ძირითადად ამ მიმართულებით გადავიდა. მორაგბეების წარუმატებლობის შემთხვევაში კი მაყურებელი მზერას ისევ ფეხბურთელებისკენ მიაპყრობს, რაც საკმაოდ შეუშლის ხელს ჩვენს საფეხბურთო ნაკრებს მშვიდად ცხოვრებასა და დასვენებაში.   გუგული მაღრაძე იდეებს დააზღვევდა, საქართველოს მოქალაქეებმა უკვე კარგად იციან რომ ამ გამორჩეულ პოლიტიკოსს ყველაზე შთამბეჭდავი იდეები მოსდის, რომელიც შემდგომ კანონის სახეს იძენს. აღნიშნული პოლიტიკოსის, საკმაოდ თამამი იდეები უკვე არიან ჩვენი ქვეყნის მოქალაქეების  ჯანმრთელობის სადარაჯოზე, ხოლო ქალბატონი გუგული კი ახალ-ახალ მოსაზრებებს გვთავაზობს ჩვენს ჯანმრთელობაზე ზრუნვის საბაბით.   ზალიკო ბერგერი სელფის ჯოხს დააზღვევდა. მისი სელფ ვიდეოები არნახული პოპულარობით სარგებლობს ქართველ ინტერნეტ მომხმარებელთა შორის, და რაც მთავარია, სორი, მაგრამ დის იზ თრუ.   დემნა გვასალია 90-იან წლებს და მასთან დაკავშირებულ მოგონებებს დააზღვევდა. ამ „საგანძურის“ არ არსებობის შემთხვევაში კითხვის ნიშნის ქვეშ დგება, რა გახდებოდა დიზიანერის შთაგონების უშრეტი წყარო.   ქართველი ფიტნეს ინსტრუქტორები და სავარჯიშო დარბაზების მფლობელები მომხმარებელთა სმარტფონებს, ან უფრო ზუსტად სმარტფონის კამერებს დააზღვდნენ. სელფის გადაღების და სავარჯიშო დარბაზში დაჩექინების საშუალების გარეშე, მათ ნამდვილად მოაკლდებოდათ საკმაოდ ბევრი მომხმარებელი.   გრიშა ონიანისთვის საუკეთესო გამოსავალი ბადრი შუბლაძის დაზღვევაა. ყველა ჩვენგან სჭირდება ღირსეული მეტოქე, რომელიც ჩვენს სიცოცხლეს აზრს აძლევს.   ქართული პრეზერვატივების ბრენდი „აიისა“ მწვანე, შავ, თეთრ, ნარინჯისფერ და სხვა დარჩენილ ფერებს დააზღვევდა, რადგანაც ყვითელი როგორც გაირკვა, ზეციური ფერია. ხოლო, წითელი და ცისფერი კი სამეფო მოსასხამის ფერი.   ქართველი მამიდები, დეიდები და ბიცოლები იმ იდუმალ აპლიკაციას დააზღვევდნენ, სადაც შესაძლებელია ნათესავებისთვის დასაპოსტი სტიკერების დამზადება. რომლებზეც ხშირ შემთხვევაში გამოსახულია  ვარდები, გულები, შამპანურის ჭიქები, გედები, ასევე მატერიალური კეთილდღეობის აღმნიშვნელი სიმბოლოები და თან ახლავს ფრაზები: ეს ჩემგან, ხმერთმა დიდი გაგიზარდოს, გიხდება მუტსელი, ჩემი დიდი გოგო და სხვა.
ისტორიები
დაზღვევა მხოლოდ ციფრები და ქაღალდები არ არის და ხანდახან  ბევრად საინტერესო ამპლუაში გვევლინება. შეიძლება აქამდე არ დაკვირვებიხართ, მაგრამ ძალიან ბევრ ფილმში დაზღვევა საკვანძო როლს ასრულებს და მოვლენების მოულოდნელი განვითარების მიზეზი შეიძლება გახდეს. დღევანდელ პოსტში გვინდა სწორედ დაზღვევის კინო როლებზე გესაუბროთ. ცხადია, ყველა ფილმს, სადაც სადაზღვევო თემაა გაჟღერებული, ვერ მოვიცავთ, თუმცა, ამ პოსტის წაკითხვის შემდეგ, ფილმების ყურებისას ალბათ თავადვე გაამახვილებთ ყურადღებას და შეიძლება გაგაოცოთ კიდეც, რამდენად ხშირად არის კინოში სადაზღვევო კომპანია თუ დაზღვევასთან დაკავშირებული საკითხები ნახსენები. დღეისათვის სასაუბროდ ათი ფილმი შევარჩიეთ:   1) Lloyd's of London (1936)   რეჟისორი: ჰენრი კინგი როლებში: ტაირონ პაუერი, მედელინ კეროლი და გაი სტენდინგი მოკლე  შინაარსი: ორი მეგობარი, ჯონათან ბლეიკი და ჰორაციო ნელსონი შემთხვევით მეზღვაურების საუბარს მოკრავენ ყურს, რომლებიც მომავალი სადაზღვევო თაღლითობის შესახებ საუბრობენ. ჯონათანი გადაწყვეტს, რომ ლოიდსის თანამშრომლებს ამ თაღლითობის შესახებ აცნობოს. საბოლოოდ, ჯონათანი ლოიდსის სადაზღვევო ბიზნესში ერთვება და წარმატებასაც აღწევს.   2) Double Indemnity (1944) რეჟისორი: ბილი ვაილდერიროლებში: ფრედ მაკმიურეი, ბარბარა სტენვიკიმოკლე შინაარსი: ფილმის სადაზღვევო აგენტის შესახებაა, რომელიც ხვდება ცოლს, რომელსაც ქმრის მკვლელობა აქვს გადაწყვეტილი და სურს, მკვლელობა უბედური შემთხვევის იერი მისცეს, რათა სადაზღვევო კომპანიისგან ანაზღაურება მიიღოს. 3) To Catch a Thief (1955) რეჟისორი:  ალფრედ ჰიჩკოკიროლებში: კერი გრანტი, გრეის კელიდიახ, დაზღვევა ჰიჩკოკის კლასიკაშიც ფიგურირებს. ამერიკელი ემიგრანტი რივიერაზე მშვიდად ცხოვრობს, თუმცა სიმშვიდე მას შემდეგ მთავრდება, რაც მას ლოიდსის მშვენიერი სადაზღვევო აგენტი ქურდის დასაჭერად ქირაობს. 4) The Wrong Man (1956) რეჟისორი: ალფრედ ჰიჩკოკიროლებში: ჰენრი ფონდა, ვერა მაილსიროგორც ჩანს, ჰიჩკოკს დაზღვევა ძალიან უყვარდა და ფილმებისთვის საინტერესო თემატიკად მიაჩნდა. მის მორიგ ფილმში, ახალგაზრდა მუსიკოსი სადაზღვევო კომპანიაში შედის, სადაც სხვა ადამიანში, კერძოდ კი ქურდში, ეშლებათ და აპატიმრებენ. მან როგორმე თავისი უდანაშაულობა უნდა დაამტკიცოს. 5) Alias Jesse James  (1959) რეჟისორი: ნორმან მაკლეოდიროლებში: ბობ ჰოუპი, რონდა ფლემინგი, უენდელ კორეი მოკლე შინაარსი:  ვესტერნი კომედია სადაზღვევო აგენტის შესახებ, რომელიც სიცოცხლის დაზღვევას შემთხვევით ცნობილ ამერიკელ კრიმინალს, ჯესი ჯეიმსს მიჰყიდის. აგენტს დასავლეთში ჯესი ჯეიმსის დასაცავად გზავნიან. თუმცა, ჯეიმსი ფერნსვორთის მოკვლას გეგმავს, რათა ანაზღაურება თავად მიიღოს. 6) The Thomas Crown Affair (1968) რეჟისორი: ნორმან ჯიუისონი როლებში: სტივ მაქქვინი, ფეი დანავეი მოკლე შინაარსი:  კიდევ ერთი პოპულარული და კლასიკური ფილმი, რომელშიც სადაზღვევო გამომძიებელი, ბანკის ძარცვას იძიებს. 7) Entrapment (1999) რეჟისორი: ჯონ ამიელი როლებში: კეტრინ ზეტა-ჯონსი, შონ კონერი მოკლე შინაარსი:  კეტრინ ზეტა ჯონსის გმირი სადაზღვევო გამომძიებელს ვეივერლის დაზღვევის თანამშრომელია. ის ხელოვნების ნიმუშების ქურდს ეძებს, მაგრამ ამისათვის თავადაც ქურდად უნდა შეინიღბოს. 8) Memento (2000)   რეჟისორი: კრისტოფერ ნოლანი როლებში: გაი პირსი, კერი-ენ მოსი მოკლე შინაარსი:  ლეონარდი, ყოფილი სადაზღვევო გამომძიებელია, რომელიც ცოლის მკვლელობის გამოძიებას ცდილობს. ის ანტეროგრადული ამნეზიით იტანჯება, ამიტომ მცირე ჩანაწერებით და სხეულზე უამრავი ტატუთი, ცდილობს ცოტა ხნის წინ მომხდარი ფაქტები აღნიშნოს და ასე გაიხსენოს წარსული.   9)  Cedar Rapids (2011)   რეჟისორი: მიგელ არტეტა როლებში: ედ ჰელმსი მოკლე შინაარსი:  კომედია ადამიანზე, რომელსაც სამსახური ყოველწლიურ სადაზღვევო კონვენციაზე. აიოვაში, სიდარ რეპიდში გზავნის თავის წარმომადგენლად. შემდგომი მოვლენები კი რა თქმა უნდა, კომედიურად ვითარდება.   10) Automata (2014) რეჟისორი: გაბე იბანიესი როლებში: ანტონიო ბანდერასი მოკლე შინაარსი:  ანტონიო ბანდერასი რობოტების კორპორაციის სადაზღვევო აგენტია, რომელიც რობოტების მიერ პროტოკოლის დარღვევის შემთხვევებს იძიებს და გამოძიების პროცესში საინტერესო ფაქტებამდე მიდის.  
online დაზღვევა
დღეს თითქმის აღარაა დარჩენილი სფერო, რომელიც ონლაინ სერვისებს არ გვთავაზობს. ბანკები, მობილური ოპერატორები,ავიახაზები, ტუროპერატორები, სამედიცინო დაწესებულებებიც კი, უკვე დიდი ხანია გამარტივებულ და სწრაფ სერვისებს გვთავაზობენ,  გვიზოგავენ დროსა და ენერგიას, რაც, დამეთანხმებით, ასე მნიშნვნელოვანია ყველასთვის. ბოლო 2 წელია ონლაინ სერვისები სადაზღვევო სექტორმაც გაააქტიურა და დღეს ყველა წამყვანი სადაზღვევო კომპანია, შეძლებისდაგვარად, ცდილობს გამარტივებული დისტანციური მომსახურება შემოგვთავაზოს. დღევანდელ გადატვირთულ რეჟიმის გათვალისწინებით, ის ფაქტი, რომ დაზღვვევის შესაძენად შეგვიძლია თავიდან ავირიდოთ  ოფისში რიგში დგომა, დროის კარგვა და უზარმაზარი პრეზენტაციების მოსმენა, ნამდვილი ფუფუნებაა. თუმცა ყველაფერს აქვს თავისი დადებითი და უარყოფითი მხარე. ამჯერად, დაზღვევის შეძენის 2 ალტერნატიულ გზას განვიხილავთ და გავიგებთ რა უპირატესობები აქვს დაზღვევის ონლაინ ან აგენტთან შეძენას.   რა უპირატესობა აქვს ონლაინ დაზღვევას?   სიმარტივე - ბევრს ჰგონია, რომ დაზღვევის შეძენის პროცესი სირთულეებთან- ხანგრძლივ და ბიუროკრატიულ პროცედურებთან არის დაკავშირებული. სინამდვილეში, ონლაინ დაზღვევა იმაზე მარტივია, ვიდრე წარმოგიდგენიათ. გაზრდილი კონკურენციის პირობებში, სადაზღვევო კომპანიები იმდენად გამარტივებულ პროცედურებს გვთავაზობენ, რომ თუ ოდნავ მაინც ერკვევით სმარტფონებსა და კომპიუტერებში, უპრობლემოდ შეძლებთ დაზღვევის ონლაინ შეძენას.  დროის ეკონომია- თუ იმ ადამიანების კატეგორიას განეკუთვებით, რომელთაც დატვირთული დღის რეჟიმი აქვს და თითოეული წუთი ძვირფასია, მაშინ ონლაინ დაზღვევა თქვენთვის ყველაზე კომფორტულია. შედიხართ საიტზე, გადაავლებთ თვალს სადაზღვევო პაკეტების პირობებსა და ფასებს, შეარჩევთ სასურველს, ბარათით გადაიხდით  და 2-3 წუთში დაზღვეული ხართ. კომფორტი - ონალაინ შეძენის კიდევ ერთი უპირატეობა მის ფასდაუდებელ კომფორტში მდგომარეობს. წარმოიდგინეთ, არ გიწევთ სადაზღვევო აგენტთან შეხვედრის შეთანხმება. როგორც იქნა როცა მოახერხებთ დათქმულ დროს შეხვედრაზე მისვლას და შემდეგ იწყება 30 სლაიდიანი  power point პრეზენტაციების და კონკურენტული უპირეატესპბებისა მოსმენა. თუ აგენტი გამოცდილი აღმოჩნდა, იქვე გაგაფორმებინებთ ხელშეკრულებას. თუ „მაძიებელი“ ტიპაჟი ხართ, ყველა დეტალს უღმავდებით და დეტალური ინფორმაციის მიღება გსურთ დაზღვევის პირობების შესახებ, სავარაუდოდ, სხვა კომპანიებისს პირობების გაგებასაც მოისურვებთ და შესაბამისად იგივე პროცესების გავლა მინიმუმ 2-3ჯერ მოგიწევთ. ამის ალტერნატივა გაცილებით კომფორტულია-თუ, პირობითად, ავტოდაზღვევა გსურთ,  შეარჩევთ რამდენიმე სადაზღვევო კომპანიას, რომელთა პირობების შესახებ ინფორმაცია დევს საიტზე. იქვე გამოთვლით ტარიფებს და ზედმეტი ზარების, შეხვედრებისა და პრეზენტაციების გარეშე მარტივად დააზღვევთ თქვენს ავტომობილს.   რა უპირატესობა აქვს აგენტთან დაზღვევას?   მეტი სიცხადე - მიუხედავად ონლაინ სერვისების სიკეთეებისა, სადაზღვევო აგენტის როლი დაზღვევის შეძენისას უმნიშვნელოვანესია და ალბათ, ასეც დარჩება.  თუ თქვენ ვერ ერკვევით დაზღვევის ტერმინოლოგიებში, პროცედურებში ან პოლისში არსებული ინფორმაცია თქვენთვის რთული გასაგებია, გაუგებრობების თავიდან ასაცილებლად  და მეტი სიცხადისთვის, საუკეთესო გამოსავალია დაზღვევა აგენტთან შეიძინოთ, რომელიც დეტალურ ინფორმაციას მოგაწვდით  პირობების, გამონაკლისებისა და პროცედურების შესახებ. მუდმივი კომუნიკაცია - დაზღვევის აგენტთან ურთიერთობით თქვენ, ფაქტობრივად, დაზღვევის პირად კონსულტანტს იძენთ, რომელთანაც გაქვთ მუდმივი კომუნიკაცია. აგენტი არის დამაკავშირებელი რგოლის თქვენსა და კომპანიას შორის. კომფორტი - ზოგისთვის კომფორტი დისტანციური სერვისებია, ზოგი კი ადამიანებთან უერთიერთობას ანიჭებს უპირატესობას, თუმცა ეს პროცესი ყოველთვის სასიამოვნო არ არის. დაზღვევის აგენტი კი არის ადამიანი, რომელიც ცდილობს ეს კომფორტი შეგიქმნათ - ყოველთვის ცდილობს თქვენზე მოარგოს დრო, მოვიდეს თქვენთან სამსახურში, კაფეში, თუ დაგჭირდათ არასამუშაო დროს, უქმეებზე, სახლშიც კი და ადგილზე გაგიწიოთ მომსახურება. ასე, რომ თუ დიდად ვერ მეგობრობთ ტექნოლოგიებთან, გიყვართ ადამიანებთან ურთიერთობა და გსურთ კომფორტული სერვისი მიიღოთ, დაზღვევის შესაძენად აგენტთან ურთიერთობა საუკეთესო არჩევანია.   ჩვენდა საბედნიეროდ, სადაზღვევო სექტორში კონკურენცუია იზრდება, შესაბამისად სერვისები იხვეწება და საბოლოო ჯამში, ჩვენზე,  მომხარებელზე ორინეტირებულ და მრავალფეროვან მომსახურებას ვიღებ. ასე, რომ ისღა დაგვრჩენია, ვიმოქმედოთ, დავეზღვეთ, ხოლო იმას თუ სად შევიძენთ დაზღვევას- ონლაინ თუ აგენტთან- უკვე ჩვენს  პრიორიტეტებზეა დამოკიდებული, მთავარია ვიცოდეთ თითოეულის უპირატესობები.
ისტორიები
სადაზღვევო ბაზარი სულ უფრო ფართოვდება და სადაზღვევო კომპანიებიც ცდილობენ, პროდუქტების უფრო ფართო სპექტრი შესთავაზონ მომხმარებლებს. დღევანდელ დღეს, ფაქტობრივად ყველაფრის დაზღვევა არის შესაძლებელი, უძრავი ქონების, თქვენს საკუთრებაში არსებული პირუტყვის, ხელფასის, სხეულის ნაწილების თუ სხვადასხვა რისკების, რომელიც შეიძლება იყოს დაკავშირებული ბიზნესთან, რომელსაც აწარმოებთ ან სხვა მრავალი. ყოველწლიურად იზრდება სადაზღვევო პრემიების მოცულობაც, რომელმაც შვეიცარული შემფასებელი კომპანიის Swiss Appraisal-ის მონაცემებით, 4.5 ტრილიონ აშშ დოლარს მიაღწია. ყველაზე მნიშვნელოვანი წილი ამ მხრივ აშშ-ზე მოდის, სადაც დაზღვეულებს 1.5 ტრილიონ დოლარს უნაზღაურებენ წელიწადში. 30%-ით ნაკლებია სადაზღვევო კომპანიების დანახარჯი ევროპაში, ჩრდილოეთ აფრიკასა და ახლო აღმოსავლეთში. აშშ-ში ყველაზე მოცულობითი სადაზღვევო კომპენსაცია გაიცა ამერიკული ბანკის Lehman Brothers-ის ბანკროტად გამოცხადების შემდეგ, 2007 წელს. მისი ზარალი ანაზღაურდა 100 მილიარდი დოლარით. მეორე ადგილზეა ქარიშხალი კატრინასგან მიყენებული ზარალის კომპენსაცია 41 მილიარდი დოლარით. ხოლო მესამეზე, ნიუ იორკის ცხობილი ტერაქტი 9/11, რომელიც 40 მილიარდი დოლარით აზანღაურდა. თუმცა, აშშ-ში გაცემულ სადაზღვევო კომპენსაციებს არც იაპონია ჩამორჩა. ჩერნობილში მომხდარი აფეთქების შემდეგ, მსოფლიოს ყველაზე მასშტაბური ტექნოლოგიური კატარასტროფა მოხდა იაპონიაში 2011 წელს. ფუკუსიმაზე მომხდარი ბირთვული აფეთქების შედეგად ეკონომიკურმა ზარალმა 350 მილიარდი დოლარი შეადგინა. გაცემული კომპენსაციების მოცულობამ კი 41 მილიარდ დოლარს მიაღწია. ამის გარდა, ბირთვულ სადგურ „ფუკუსიმა 1-ზე“ მომუშავე ოპერატორებისთვის კიდევ 1 მილიარდი დოლარის სადაზღვევო კომპენსაცია გაიცა. სიცოცხლის დაზღვევის ყველაზე მსხვილი ანგარიშსწორება კანადაში დაფიქსირდა ჯორჯ მიულერის ტრაგიკული სიკვდილის შემდეგ, 1971 წელს. მიულერი ხულიგნებისგან იცავდა თავის რანჩოს, რასაც მისი სიცოცხლე შეეწირა. რიგითი ფერმერის სიცოცხლე სადაზღვევო კომპანიების მიერ 14 მილიონ კანადურ დოლარად იქნა შეფასებული, რაც მცირედით ჩამოუვარდება ამერიკული დოლარის ფასს. თუმცა ადამიანთა დიდი ნაწილი, ხშირად მაინც უარს ამბობს სიცოცხლის დაზღვევაზე, რადგან ასეთ შემთხვევაში სადაზღვევო თანხა, სამწუხაროდ ჩვენ აღარ გვერგება. ჩვენს ახლობლებს კი, მაგალითად 14 მილიონი, თუნდაც კანადური დოლარი, საგრძნობლად შეუმსუბუქებდა ჩვენი დაკარგვით გამოწვეულ ტკივილს.   დაზღვევის ისტორიაში ერთ-ერთი ყველაზე საინტერესო შემთხვევა იყო ყველასათვის ცნობილი გემი „ტიტანიკი“. ხომალდის აგება იმ დროისათვის 7.5 მილიონი აშშ დოლარი დაჯდა. ამის მიუხედავად, ის მხოლოდ 5 მილიონ დოლარად დააზღვიეს 70-ზე მეტ სადაზღვევო კომპანიაში. კატასტროფის შემდეგ ანაზღაურებამ 12 მილიონი დოლარი შეადგინა, რაც მაშინ, ინფლაციის გათვალისწინებით არნახულ თანხას წარმოადგენდა. „ტიტანიკთან“ ბევრი სხვადასხვა მითია დაკავშირებული, რომელიც შეიქმნა გემის მშენებლობის დაწყებამდეც კი. ყოვლისშემძლე ტექნოლოგიური პროგრესი ბრწყინვალე ნიმუში, რომელსაც ყველა ბარიერის გადალახვა შეუძლია, ასეთი იყო მოლოდინები ტიტანიკის მიმართ. თუმცა, მისმა კატასტროფამ კიდევ ერთხელ ცხადყო რომ ასეთი დიადი წამოწყებაც კი განწირულია თუ მას ბუნება დაუპირისპირდა. კიდევ ერთი მითი, რომელიც ტიტანიკთან ერთად დასამარდა, მსოფლიო სადაზღვევო ბაზრის გიგანტების შესაძლებლობებს უკავშირდება, რომლებსაც თითქოსდა უნდა ჰქონოდათ უნარი, წინასწარ განეჭვრიტათ რისკები, რათა ზარალი აეცილებინათ თავიდან. ტიტანიკის კატასტროფა ისტორიაში შევიდა არა მხოლოდ როგორც ადამიანთა ტრაგედია, რომლებიც დაიღუპნენ გემზე, არამედ ასევე დასამახსოვრებელი იყო უსასრულოდ გაგრძელებული სასამართლო პროცესებით, რომელთაგან ზოგი დღემდე დაუსრულებელია. სადაზღვევო კონტრაქტების საფუძველზე ანაზრაურდა წარმოიდგენელი მოცულობის ძვირფასეულობა, რომელიც გემზე იყო განთავსებული. ტიტანიკზე იყო 8 მილიონი ფუნტი სტერლინგის ოქრო, 5 მილიონი ბრილიანტი (1912 წლის ფასებით), მგზავრები პირადი ძვირფასეულობა, რომლებიც მილიონერებს წარმოადგენდნენ. ასევე გემზე იყო უნიკალური ისტორიულ-კულტურული ობიექტები: ომარ ხაიამის შეუფასებელი მანუსკრიპტი - „რუბაიათი“, ასევე ეგვიპტის ფარაონ ამენხოტეპ I-ის მმართველობის პერიოდის მუმია და უამრავი სხვა. რაც შეეხება სადაზღვევო კომპენსაციას ადამიანთა სიცოცხლისთვის (მგაზრტა რიცხვი კი 1554 ადამიანს შეადგენდა, რომელთაგან მხოლოდ 703 გადარჩა) სრულად ანაზრაურდა და ახლაც, 100-ზე მეტი წლის გასვლის შემდეგ, გარდაცვლილთა ზოგიერთი ნათესავი ჯერ კიდევ იღებს სადაზღვევო თანხას. ტიტანიკთან დაკავშირებულია ბევრი უცნაური დამთხვევა, რომელთაგან ერთ-ერთი უკავშირდება მანამდე თითქმის ყველასათვის უცნობი მწერლის მორგან რობეტრსონის 1898 წელს (ანუ, კატასტროფამდე 14 წლით ადრე) გამოცემულ წიგნს - „ამაოება“. ნაწარმოებში დეტალურად იყო აღწერილი ატლანტის ოკეანეში აისბერგთან შეჯახების შედეგად სუპერ-ლაინერის დაღუპვა. გემის სახელიც კი საეჭვოდ ემთხვევა, რომელსაც წიგნში „ტიტანი“ ერქვა. არსებობს შეთქმულების თეორია, რომლის მიხედვითაც გემის მფლობელებს სურდათ გაეთამაშებინათ კატასტროფა, რათა სადაზღვევო თანხა მიეღოთ. ამ ვერსიით მათ გეგმაში შედიოდა მგზავრების ევაკუაცია, გემის ჩაძირვა და კომპენსაციის მიღება, თუმცა საბოლოოდ ყველაფერი გეგმის მიხედვით ვერ წარიმართა. ჩანაფიქრის განსახორციელებლად დაიქირავეს კაპიტანი სმიტი, რომელიც განთქმული იყო თავისი ავანტურისტული ბუნებით, თუმცა საბოლოოდ მისი სიციცხლეც ტიტანიკზე დარჩა. ასეა თუ ისე, ტიტანიკი რჩება დღემდე ერთ-ერთ ყველაზე მძიმე ტრაგედიად, ხოლო მისთვის გაცემული სადაზღვევო კომპენსაცია კი ისტორიულ რეკორდად. თუმცა, ის ფაქტიც უცვლელია რომ ამ კატასტროფის შედეგად ბევრი ადამიანი საკმაოდ მოგებული დარჩა.
კვირის რჩევები
საქართველოში არსებული სოციალური ფონისა და ქვეყნის ეკონომიკური მდგომარეობის გათვალისწინებით, მაშინ როდესაც მოსახლეობის დიდ ნაწილს, საკუთარი ყოველთვიური შემოსავლის მნიშნელოვანი პროცენტული წილის გადადება უწევს ისეთი ყოველთვიური ხარჯებისთვის როგორებიცაა: ელექტროენერგიის გადასახადი, გაზის გადასახადი, წყლის გადასახადი, დასუფთავების გადასახადი, საკუთარი ან საკუთარი ოჯახის წევრის განათლების დაფინანსების ხარჯები, მობილური ტელეფონის ხარჯები, სხვადასხვა საკრედიტო ვალდებულებების შესრულების მიზნით ფინანსური ორგანიზაციებისთვის გადასახდელი თანხები და სხვა მსგავსი ფინანსური დანახარჯები, ამ სიის თუნდაც ერთი პუნქტით გაზრდის გადაწყვეტილების მიღება ხშირად არის საყოყმანო საკითხი. თუმცა, მოდით გავიხსენოთ ძველი სიბრძნე იმის შესახებ, რომ ძუნწი ორმაგს იხდის. მართლაც და, ეს ანდაზა ძალიან ბევრ სიტუაციაში ამართლებდა და დღემდე ამართლებს საკუთარ აზრს. მაგალითად, ფულის ეკონომიის მიზნით დაბალ ფასიანი პროდუქტის შეძენის შემდეგ, თქვენ შესაძლოა, შენაძენით უკმაყოფილო აღმოჩნდეთ ან ნივთი მალე გამოვიდეს მწყობრიდან და იგივე ხარჯის მეორედ გაწევა მოგიწიოთ. სიძუნწის სავალალო შედეგების სიაში მნიშვნელოვანი ადგილი უკავია სადაზღვევო სერვისებისა და პროდუქტების უგულვებელყოფას, მათი საფასურის, კერძოდ კი მცირე ყოველთვიური გადასახადის თავიდან არიდების მიზნით. რატომ? იმიტომ, რომ სადაზღვევო პაკეტში დახარჯული X თანხა შესაძლოა, რომ მომავალში, აღნიშნული X თანხაზე ათჯერ ან ასჯერ დიდი ოდენობის ხარჯისგან გათავისუფლების მიზეზი გახდეს. ხოლო იმ შემთხვევაში თუ თქვენ ამ X თანხის ყოველთვიურ ეკონომიას ახდენთ, შესაძლოა, აღმოჩნდეთ ძუნწი, რომელსაც ორჯერ, სამჯერ ან ათჯერ მეტის გადახდა მოუწევს. (გააჩნია შემთხვევას) მეტი კონკრეტიკისთვის განვიხილოთ ავტომობილის დაზღვევის მაგალითი. იმ შემთხვევაში თუ თქვენ ავტოდაზღვევაზე ეკონომიას აკეთებთ და ამით თქვენი ყოველთვიური ხარჯების შემცირებას ცდილობთ, ფულის ეკონომიის ეს გზა აუცილებლად გაგიხდებათ სანანებელი იმ შემთხვევაში თუ თქვენი ავტომობილი დაზიანდა და მისი შეკეთების ხარჯების გაწევის აუცილებლობის წინაშე დადგებით. უფრო მეტიც, თუ თქვენი ავტომობილის დაზიანების პროცესში, თქვენი ბრალეულობით, თქვენს ავტომობილთან ერთად სხვა ავტომობილებიც დაზიანდა, თქვენ მათი შეკეთებისთვის აუცილებელი ხარჯების გაწევაც მოგიწევთ. კოლოსალური ხარჯების თავიდან აცილება არ გახლავთ თქვენი სატრანსპორტო საშუალების დაზღვევის აუცილებლობის მხოლოდ ერთადერთი მიზეზი, რადგან ავტო დაზღვევას სხვა ღირსებებიც გააჩნია. ავტომობილის დაზღვევის სხვა მიზეზები მიზეზი N1 - კომფორტი ავტოსაგზაო შემთხვევის დროს, თქვენ შეგიძლიათ დარეკოთ თქვენს სადაზღვევო აგენტთან. ის მაქსიმალურად სწრაფად მოვა შემთხვევის ადგილზე და საკუთარ თავზე სრულად ან ნაწილობრივ აიღებს ყველა იმ უსიამოვნო საკითხის მოგვარებას, რომელიც თან ახლავს ავტოსაგზაო შემთხვევას. (დაზიანებული ავტომობილის ან ავტომობილების ევაკუაცია, ავტოსაგზაო შემთხვევის სხვა მონაწილეებთან კომუნიკაცია და ასე შემდეგ..) მიზეზი N2 - სიმშვიდე როდესაც თქვენი ავტომობილი დაზღვეულია, თქვენ შედარებით ნაკლებს ნერვიულობთ არამხოლოდ ავარიებზე, არამედ ისეთ საფრთხეებზეც, როგორებიცაა: ხანძარი, სეტყვა, მიწისძვრა, ზვავი, მოტეხილი და თქვენს მანქანაზე დაცემული ხის ტოტი, მშენებარე ნაგებობიდან გადმოვარდნილი ან გადმოღვრილი სამშენებლო მასალა, მეზობლის ბავშვების მიერ საქარე მინისთვის გარტყმული ბურთი, ვანდალიზმი და სხვა. აღსანიშნავია ისიც, რომ მართალია ჩვენს ქვეყანაში ავტომობილის მოპარვის ფაქტებს ადგილი აღარ აქვს, მაგრამ მათი გაძარცვის (ავტომობილის შიგთავსის, საბურავების ან სხვა გარე ნაწილების მოპარვა) ფაქტები იშვიათად, მაგრამ მაინც ფიქსირდება ჩვენს დედაქალქში. სადაზღვევო პაკეტის შემდეგ, ნებისმიერ ზემოაღნიშნული უსიამოვნება ხდება თქვენი კი არა სადაზღვევო კომპანიის პრობლემა, რადგან სწორედ მას უწევს თქვენი დაზიანებული ავტომობილის შეკეთება ან მოპარული ნაწილების შეძენა. მიზეზი N3 - მძღოლის კეთილსინდისიერება იმ შემთხვევაში თუ თქვენი ავტომობილით სხვა ადამიანების ქონებას ან ჯანმრთელობას დააზიანებთ ამ ადამიანებზე ის სადაზღვევო კომპანია იზრუნებს, რომლის ავტოდაზღვევის პაკეტსაც ფლობთ თქვენ. ეს იმას ნიშნავს, რომ საჭიროების შემთხვევაში, სადაზღვევო კომპანია თქვენს შეცდომებს თქვენს ნაცვლად გამოასწორებს და შეიძლება ითქვას, რომ თქვენს ნაცვლად მოიხდის ბოდიშს, არა სიტყვებით არამედ ქმედებებით. მიზეზი N4 - საკრედიტო ვალდებულებები ავტომობილის დაზღვევა განსაკუთრებით აუცილებელია მათთვის, ვისაც საკუთარი სატრანსპორტო საშუალება კრედიტის საშუალებით აქვს შეძენილი. ვალით ნაყიდი მანქანის დაზიანების შემთხვევაში, თქვენ ორმაგ წაგებაში ხართ, რადგან თუ ავტომობილს დაამტვრევთ, მოგიწევთ იხადოთ იმ ნივთის საფასური, რომელიც აღარ არსებობს. ეს ფაქტი კიდევ უფრო სავალალო შედეგებს მოგიტანთ იმ შემთხვევაში თუ თქვენს ცხოვრებაში ფინანსური კრიზისი შეიქმნება და კრედიტის გადახდას ვეღარ მოახერხებთ, რადგან დამტვრეული მანქანის გაყიდვით, მის შესაძენად აღებული თანხის დაბრუნება შეუძლებელია. მოკლედ, რომ ვთქვათ, ავტომობილის დაზღვევის აუცილებლობის 5 მთავარი მიზეზი გახლავთ: გაუთვალისწინებელი ფინანსური ხარჯებისგან თავის დაცვა და საკუთარი ფულის გონივრულად გადანაწილება; მძღოლის კომფორტის უზრუნველყოფა; მძღოლის სიმშვიდის უზრუნველყოფა; მძღოლის კეთილსინდისიერების უზრუნველყოფა; საკრედიტო ვალდებულებების დამძიმებისგან თავის დაცვა. ავტოდაზღვევის ტიპები მომხმარებლის მოთხოვნების მრავალფეროვნებიდან გამომდინარე, არსებობს ავტომობილის სხვადასხვა სადაზღვევო პაკეტები. თქვენ შეგიძლიათ დააზღვიოთ მანქანა: სტიქიური უბედურებისგან, ვანდალიზმისგან, ავტოსაგზაო შემთხვევისგან და ა.შ. ზოგიერთი სადაზღვევო პაკეტი მოიცავს მხოლოდ ავტომობილის დაზღვევას, ზოგიერთი კი ავტომობილთან ერთად აზღვევს მისი მძღოლისა და მგზავრის ჯანმრთელობასაც. ასევე არსებობს ე.წ. მესამე პირის დაზღვევა, რომლის შეძენის შემთხვევაშიც, სადაზღვევო კომპანია უზრუნველყოფს თქვენს მიერ, სხვა ადამიანებისთვის მიყენებული მატერიალური ზარალის ან ფიზიკური დაზიანებების აღმოფხვრისთვის საჭირო პროცედურების ჩატარებასა და დაფინანსებას. რა თქმა უნდა, იდეალური ვარიანტია ის სადაზღვევო პაკეტი, რომელიც ყველა ზემოაღნიშნულ სერვისს ერთდროულად მოიცავს, თუმცა არჩევანი პირადად თქვენზეა დამოკიდებული.
ისტორიები
გაუთვალისწინებელი არასასიამოვნო შემთხვევები ნებისმიერ ჩვენგანს შეიძლება დაატყდეს თავს სრულიად მოულოდნელად. სწორედ ამგვარი შემთხვევებისგან თავის დაცვას ცდილობდნენ ის ადამიანები, რომელბზეც ქვევით მოგითხრობთ. წარმოგიდგენთ გამაოგნებელი და სახალისო სადაზღვევო ისტორიების ხუთეულს: ბრიტანელმა ფერმერმა აივორ ბანეტმა მიმართა სადაზღვევო კომპანიას და მოითხოვდა კომპენსაციის თავისი ტელეფონის გამო, რომელიც, მისი თქმით სრულიად მოულოდნელად გაფუჭდა. თითქოს ტელეფონის გაფუჭებაში უცნაური არაფერია, თუმცა მიზეზი მართლაც საყურადღებოა. მისი IPhone დაზიანდა მას შემდეგ, რაც ძროხაში „იმოგზაურა“. როგორც გაირკვა მესაქონლე იყენებდა ტელეფონის ფანარს, როდესაც ძროხას ამშობიარებდა. მშობიარობა გვიან ღამით მიმდინარეობდა. უცნობია როგორ, მაგრამ აივორმა ტელეფონი ძროხის სწორ ნაწლავში მოათავსა, რის შემდეგაც ტელეფონი დაკარგა. მოგვიანებით, ტელეფონი დღის სინათლეს ბუნებრივი გზით დაუბრუნდა, თუმცა უკვე დაზიანებული. შედეგად აივორს სადაზღვევო კომპანიამ ზარალი სრულად აუნაზღაურა.   ჩრდილოეთ კაროლინაში მცხოვრებმა მახვილგონიერმა ადვოკატმა შეიძინა ერთი ყუთი ძვირადღირებული სიგარა, რომელიც დააზღვია წყალდიდობისგან, ქარიშხლისგან და ხანძრისგან. ერთი თვის განმავლობაში ადვოკატი ტკბებოდა თამბაქოს არომატული კვამლით, საბოლოოდ კი მთელი ყუთი მოწია. როდესაც სიგარა დაუმთავრდა, სადაზღვევო კომპანიას მიმართა ზარალის ანაზღაურების მოთხოვნით, რამეთუ დაზღვევის ობიექტი დაზიანებული იყო მთელი რიგი „მცირე ხანძრებისგან“. მზღვეველმა უარი განაცხადა ზარალის ანაზღაურებაზე, საბოლოოდ კი საქმე სასამართლომდე მივიდა. იმის საფუძველზე, რომ ხელშეკრულებაში არ იყო აღნშნული რა ტიპის ხანძარი უნდა აენაზღაურებინა კომპანიას და რა ტიპის არა, სასამართლომ დაადგინა: სადაზღვევო კომპანია ვალდებული იყო კლიენტისთვის გადაეხადა 15 000 $. ამასთანავე, ადვოკატი დაადანაშაულა დაზღვეული ნივთის განზრახ დაზიანებაში, რის გამოც მას სასამართლომ 24 თვიანი პატიმრობა და 24 000 $ ჯარიმა შეუფარდა.   ეს საკმაოდ უცნაური სადაზღვევო შემთხვევა დიდ ბრიტანეთში, ესექსში მოხდა. შოტლანდიის ჩრდილოეთში მცხოვრებმა სამმა დამ, რომლებიც ერთ-ერთი ქრისტიანული სექტის წევრები იყვნენ, გადაწვიტეს თავიანთი ქალწულობა დაეზღვიათ, რათა შემთხვევით არ დაორსულებილიყვნენ უბიწო გზით ისესო ქრისტეს მეორედ მოსვლის ჟამს.   დები 2000 წლიდან მოყოლებული ყოველწლიურად იხდიდნენ 100 ფუნტს, ხოლო „ზარალის“ შემთხვევაში ერთ მილიონ ფუნტს მიიღებდნენ. სადაზღვევო კომპანია, რასაკვირველია, თანახმა იყო, რადგან საკმაოდ რთული იქნებოდა იმის დამტკიცება რომ „ზიანი“ მართლაც უბიწო გზით მიადგათ დაზღვეულებს. რამდენიმე წლის შემდეგ ამგვარი ტიპის სადაზღვევო ხელშეკრულებები შეწყდა, როდესაც კათოლიკურმა ეკლესიამ მწვავე პროტესტი გამოთქვა აღნიშნულის მიმართ.   საახალწლო სამზადისში ჩართული ბატონი ფეირკლოუ სანოვაგით და საჩუქრებით დატვირთული შინ ბრუნდებოდა. თუმცა, საღამო უიღბლო გამოდგა. მისი თქმით: წინ მიმავალი მანქანა გადაჭარბებული სიჩქარით მიდიოდა, რომელსაც სახურავზე ნაძვის ხე ჰქონდა მიმაგრებული. მკვეთრ მოსახვევში ნაძვის ხელ მოწყდა და მის მანქანას შეეჯახა.   ნაძვის ღერო ჩაერჭო მისი მანქანის კაპოტში, რის შემდეგაც მძღოლმა მართვა დაკარგა და გზიდან გადავიზა. ბატონი ფეირლოუ, ასევე დასძენს, რომ წინ მიმავლმა მანქანამ გადაადგილება არ შეწყვიტა და გაუჩინარდა.   შედეგად, დაზარალებულს სრულად აუნაზღაურა ზარალი სადაზღვევო კომპანია. პოლიციის განცხადებით, მათ შეეძლოთ საქმის აღძვრა დამნაშავის წინააღმდეგ, თუმცა დაზარალებულმა უარი განაცხადა.   ქორწილი ბრწყინვალე დღეა, ერთ-ერთი ყველაზე მნიშვნელოვანი დღე ახალშეუღლებულების ცხოვრებაში. თუმცა, მოულოდნოლებები ასეთ დღეებშიც ხდება. საკმაოდ უსიამოვნო ქორწილი გამოუვიდა იტალიელ პაულინა კატელის. იმ დღეს პატარძალი საოცრად ლამაზი იყო, ეცვა ხელით შეკერილი ძვირადღირებული საქორწინო კაბა... იქამდე, სანამ ის აგიზგიზებულ მაყალს არ მიუახლოვდა. ალი მყისიერად მოედო მთელ ქსოვილს. ნეფე არ დაიბნა, ის ხელში აიტაცა და ცეცხლოვან პატარძალთან ერთად ზღვაში გადახტა. საბედნიეროდ, ორივე მათგანი კარგად ცურავდა.   მართალია ხელშეკრულებით არ იყო განსაზღვრული ამგვარი ზარალის კომპენსაცია, თუმცა სადაზღვევო კომპანიამ ზარალის 50% მაინც დაფარა, შესაძლოა მხოლოდ თაბაგრძნობის გამო.
დაზღვევის ანბანი
დაზღვევის გაფორმება ძალიან მარტივია - სულ რამდენიმე წუთშია შესაძლებელი, სადაზღვევო პოლისი ხელში დაიჭიროთ. თუმცა, სანამ დაეზღვევით, კარგი იქნება თუ ეს სფერო იდუმალებით მოცული არ დარჩება თქვენთვის და რამდენიმე დეტალში გაერკვევით. დაზღვევისას თქვენსა და სადაზღვევო კომპანიას შორის აუცილებლად ფორმდება ხელშეკრულება. ერთი შეხედვით რამდენადაც რთულად და მოსაწყენად შეიძლება მოგეჩვენოთ ეს ხელშეკრულება, იმდენად მარტივი და იოლია რეალურად, თუ სადაზღვევო ტერმინოლოგიაში გაერკვევით და ისე წაიკითხავთ. ეს კი არც ისე რთულია. ქვემოთ მოყვანილია 5 სადაზღვევო ტერმინი, რომელიც დაზღვევამდე უნდა იცოდეთ. 1) პრემია შეიძლება თქვენთვის "პრემია“ შემოსავალთან და წარმატებასთან ასოცირდებოდეს, მაგრამ სადაზღვევო სფეროში ეს ასოციაცია დაივიწყეთ, რადგან სადაზღვევო პრემია ეწოდება თანხას, რომელსაც დაზღვევაში იხდით. პრემია შეიძლება იყოს ყოველთვიური, კვარტლური ან წლიური. 2) ლიმიტი ამ შემთხვევაში საქმე უფრო იოლადაა და ლიმიტი ნამდვილად ლიმიტს ნიშნავს, ანუ თანხის მაქსიმუმს, რომელსაც სადაზღვევო კომპანია აგინაზღაურებთ. მაგალითად, თუ თქვენ ჯანმრთელობის დაზღვევით სარგებლობთ და სტომატოლოგიურ მომსახურებაზე 1000 ლარი გაქვთ ლიმიტი, პოლისის მოქმედების, ანუ 1 წლის განმავლობაში, სტომატოლოგიურ მომსახურებაზე 1000 ლარი შეგიძლიათ დახარჯოთ. ამ თანხას თუ ამოწურავთ, სტომატოლოგიაზე დაზღვევით პოლისის განახლებამდე ვეღარ ისარგებლებთ. 3) გამონაკლისები აქ ისევ უნდა გადავუხვიოთ პირდაპირ ასოციაციებს. ეს ტერმინი ყველა ხელშეკრულებაშია გამოყენებული და აღნიშნავს იმ შემთხვევებს, რაც დაზღვევით არ ანაზღაურდება. შესაბამისად, როცა დაზღვევის სფეროში "გამონაკლისი" გესმით, არ ნიშნავს, რომ თქვენთვის გამონაკლისს უშვებენ და ზარალს ანაზღაურებენ. გამონაკლისები ანაზღაურებას არ ექვემდებარება. 4) ფრანშიზა ეს უცნაური ჟღერადობის სიტყვა აღნიშნავს თანხის იმ ნაწილს, რომელსაც თქვენ იხდით სადაზღვევო შემთხვევისას. უფრო მარტივად რომ ავხსნათ, ისევ სტომატოლოგიური მომსახურების მაგალითს მივმართოთ: თუ ჯანმრთელობის დაზღვევით სარგებლობთ და სტომატოლოგია 60%-ით გეფარებათ, ეს იმას ნიშნავს, რომ ამ მომსახურებაში დახარჯული თანხის 60%-ს სადაზღვევო კომპანია დაფარავს, 40%-ს კი - თქვენ. სწორედ ეს 40%-ია ფრანშიზა. მეორე მაგალითი ავტოდაზღვევაზე ვნახოთ - თუ თქვენ ავტომობილს აზღვევთ და პოლისში მითითებულია, რომ ფრანშიზა 100$-ს შეადგენს, შესაბამისად, სადაზღვევო შემთხვევის დროს ასანაზღაურებელ თანხას ეს 100$ გამოაკლდება და დანარჩენი თანხა აგინაზღაურდებათ. რატომ ვირთულებთ საქმეს და ვიყენებთ ფრანშიზას? იმიტომ, რომ ფრანშიზა ფასწარმოქმნაში გვეხმარება და უხეშად რომ ვთქვათ, პოლისს გვიიაფებს. შესაბამისად, ფრანშიზის გარეშე დაზღვევა უფრო ძვირი ღირს. 5) სადაზღვევო შემთხვევა ყველა შემთხვევას, როდესაც საქმეში დაზღვევა ერთვება და თანხას ანაზღაურებს, სადაზღვევო შემთხვევა ეწოდება. ხელშეკრულებაში მკაფიოდ და ზუსტადაა გაწერილი, რა შემთხვევებს ანაზღაურებს დაზღვევა. სადაზღვევო შემთხვევები და გამონაკლისები (გახსოვთ გამონაკლისები? სულ ცოტა ხნის წინ, ზევით ვისაუბრეთ) ერთმანეთს ავსებს და არც ერთი შემთხვევა რჩება კონტრაქტს გარეთ. შესაბამისად, ზუსტად იცით, რა შემთხვევის ანაზღაურებას უნდა ელოდოთ და პირიქით, რა არ აგინაზღაურდებათ. ამიტომ, ხელშეკრულებაში გამონაკლისების და სადაზღვევო შემთხვევების კარგად გაცნობა მომავალი გაუგებრობებს თავიდან აგარიდებთ.
ახალი პოსტები
სად დავაზღვიოთ ავტომობილი
როგორ შევიძინოთ მედიკამენტები იაფად
რა სარგებლობა მოაქვს წყალს
ლამაზი კბილების ფასი